paise ka aakarshan

paisa bhi kaisa chumbak hai sabko apni aor aakarshit karta
chota bada gareeb ameer sab ko apne aagosh mein bharta
barabari ka hai ye ek behtareen zariya
jitna ho jiske paas utna hi badhiya

aisi trishna jo kabhi na bhujhe
jiski bujhe uski antim shayya saje
aisa akarshan ki manushya lagaye nirantar iske chakkar
na hota ye suraj to manushya rehta mrit, jeevit reh kar

hai ye atoot bandhan, chahe ek tarfa hi sahi
hai sachcha pyar yehi jisme dhokha hi nahi
jitna zyaada jiske paas utna hi use aur mile
utna hi wo aur phale uski bagiya aur khile

iski bhashaa har jagah smaan
amrika,britan ya hindustan
bhin bhin vastron mein dikhti
apne aakar se sabko lubhati

phat jaaye to jod ke chale
bheeg jaye phir bhi na gale
jhuriyon se bhi na umr dhale
kisi ko bhi na kabhi ye khale

janm se mrityu tak hai jiski zaroorat
ho jiske paas lage wohi khoobsoorat
hai ye manushya ki hi paidaish
par hai kaise nahi iski koi khwahish

Agar main panchchi hota

Agar main panchchi hota
udta main unmukt gagan mein
kabhi is daal kabhi us daal par
kuch aisa banjara hota
agar main panchchi hota

kar pata bhraman duniyan ka
bin chinta passport ya visa
na hota ek desh ka wasi
na bandhan kisi jaat ka hota
agar main panchchi hota

leta har mausam ka anand
greeshma ritu ya ho sharad
khoob maza aata baarish ka
jab sar par na chhata hota
agar main panchchi hota

karta roz swagat savere ka
shafaq milaati haath mere se
pawan bhi mujhse baatein karti
sangeet ka bhi gyata hota
agar main panchchi hota

duniyan mein soundarya failata
kitni kaliyon ko main choomta
kitne pholon ka ras peeta
aur unhe bikhraana hota
agar main panchchi hota

ho sakta hai shobha badhata
bade bade ghar walon ki
karte methi baat mere se
jo band kisi pinjre mein hota
agar main panchchi hota

na hoti koi ichchayen
na ummeeden koi hotin
koi dukh na mujhe satata
aisa hi koi sant main hota
agar main panchchi hota

kabhi savari gadhe ki karta
kabhi mein hota taj singh ka
kabhi kisi ki khaaj khujaata
jangal mein mangal hi hota
agar main panchchi hota

hota bas afsos yehi ki
nahi samajh pata duniyan ko
na aata mein kaam kisi ke
aur na gyan kisi ka hota
agar main panchchi hota

haan mein manushya hoon
matlabi hoon khudgarz bhi
hoon apni hi soch mein gumsum
soch mein main na kisi ki hota
agar main panchchi hota

hokar manushya bhi kya paya
logon ke phir bhi kaam na aaya
aur kiya dooshit is jag ko
paison ka lalach na hota
agar main panchchi hota

Einstein

Jitni karoon koshish ise samjhne ki utni hi zyaada ulajhti jaati hai

Us bartan ki tarah jisme se jitna nikalo utni hi phir bhar aati hai

Kya samay sabke liye samaan hai ki judwa bhai hamesha rahen hum umr

Ya rahe jawaan wo, jiski umr kirnon ki gati se safar karke aati hai

Kiranon ki nadiyan behti hain ya ki kanche hain ye bachchon ke

Hai kitni adbhut ye kirnen ki hamen dono hi roopon se rijhaati hai

Hotin ye gar kisi ek tarah ki to na jaane jeevan kaisa hota

Na hota savera jaisa hai, aur na hoti jaisi unnati hai

Gar hota aasaan ek sansaar se jaana doosre sansaar mein

To uthate lutf us sangeet ka jo wahan ki koyal gaati hai

Rahega naam sada jeevit “einstein” tera in sabhi sansaaron mein

Hogi tulna un logon mein gaatha jinki sunahare aksharon mein likhi jaati hai

my indulgence into poetry

Sawaal

Ek kavita likhne ki hai tamanna aaj

Isi soch ki jwala mein hai jalna aaj



Karna kya hai zindagi mein nahi kuch bhi padta maloom

Kiye jaayen jo karte hain, ya ki chalan apne kadmon ka hai badalna aaj



Aisa kyon hai ki har subha liye khadi hai ek sawaal mere saamne

Pherloon muh in sawaalon se, ya inhi ke bhanwar mein hai utarna aaj



Sawaalon ke is van se lagta hai milegi ek raah nayi

Us sunahare sawere ki chahat mein, is andhere ko hai nigalna aaj

**********************************************************************



Ek ajab si khushi

Ek ajab si khushi hui mehsoos mere dil mein

Aaya nazar mujhe ek dost, mere katil mein



Jab likhe insaan taqdeer apne haathon se

Tab rank bhi hota hai raja apni mehfil mein



Dole nayya kitni hi beech majhdhaar mein

Doobti nahi kabhi bhi kashti sahil mein



Agar hota hai ghayal insaan nazron ke teer se

Jaal kya hai aisa phir hothon ke til mein

***************************************************************


Lahron ke saath bahe to kya kiya ?

Sirf Phoolon se khele to kya kiya ?



Is bhari duniyan mein lekar janm

Bas apne hi liye jiye to kya kiya ?



Chalte rahe rahi bane har rah par

Na rah koi banayi nai to kya kiya ?

kitni hi mushkilein aaye rahon mein 
Hosla gar khoya to kya kiya ?